二千零七年六月十二日，朝早七點幾，已步出飛機，我地都過埋海關。我係運輸帶等行理等到吽 Q 左，因為原來個日有個台灣既遊學團，成班 o靚仔 o靚妹吱吱 o左 o左煩到死。之後，我同我既 “肥安西” 攞住 o的行理行出巴黎戴高樂機場。然後跳上婚紗公司一早安排好，接我地去酒店既的士上面。係酒店 lobby 見埋將會幫我地影結婚相既攝影師太太同 check-in 埋之後，我地就準備向巴黎市出發！

 第一日

我地由婚紗店安排，住係好近羅浮宮既 Ascot Opera Hotel Paris。係搞掂哂 o的野之後，攞埋腳架同 set 好相機之後就出發。睇睇我手上 o個本 JTB 巴黎書，見到最近酒店既係羅浮宮，所以我地就出發… 行路去。途中行到一個街口見到聖女貞德個像… 再行冇耐，我地就由卡塞爾凱旋門行入去羅浮宮。點知去到先知星期二休息… 毛耐地，我地又行去第二個目標。睇一睇書仔，凱旋門好似好近，咁咪又試下行過去囉。先行過圖勒里公園，再行過協和廣場，我地就走入香榭麗舍大道。途中經過大宮殿同小宮殿，之後再經過 LV 總壇… 行到傻 Q 左先行到去凱旋門。之後我地撘 Metro 返酒店有咁耐透咁耐。透翻夠本先又再行動，走左去加尼葉歌劇院，之後再去到老佛爺百貨公司行左陣就走去揾野食同返酒店訓覺。

第二日、第三日…

去左影結婚相…

第四日

影完結婚相，心情輕松哂。睇睇本書仔，我地就決定先行去街口間星巴克食個早餐。食完就出發行去聖母院。途中先經過莫里哀噴泉，再經過皇宮，再行迅羅浮宮外圍，聖厄斯塔許教堂，之後行過無罪之泉，再經過巴黎市政廳就到達聖母院。行左陣，就撘 Metro 返羅浮宮，正式入去行下見識下。係 Metro 出黎，經過倒金字塔之後我地就入左去行。行左兩個幾鐘頭，行到傻左就返酒店透下。毛幾耐，我個小學同學就 call 我話係巴西返左黎，可以出去行下。見咁啱夜晚，所以決定去艾非爾鐵塔睇下，因為夜晚時份每當時分針搭正十二點，成左塔就會閃閃下。去到差不多夜晚十一點七八分鐘左右，見到座塔係咁閃就唔理三七二十一，攞部相機影低先。之後就返酒店訓覺啦。

第五日…

我朋友個老公租左架呠呠車，車我地出走巴黎。揸左大約個零鐘頭車去到巴黎市郊，Chateau de Vaux Le Vicomte。我地先行左馬車房睇下馬車，再行埋宮殿，上埋鐘樓。係鐘樓望落個花園真係哇左一聲！好銀大呀！跟住我地之後走埋落花園行。行左冇耐竟然落雨！不過，好彩我地都打算走人，所以咪返歸囉。返到巴黎市，我地去左間好 Q 大既超市，大到連家電同 PS3 都有賣！行完買完再去買鴨肝之後返酒店。夜晚，我朋友老公還左車之後，我地撘 Metro 去食晚飯。個餐真係超正！

ps. o個日咁啱係我個 “肥安西” 生日，所以事先叫左朋友買花花… 我個朋友就買左牡丹。好靚靚。

第六日…

原先約好同朋友一齊去凡爾塞宮，點知佢同佢老公唔記得起身。所以得翻我地兩個拍住拖去。我地先撘 Metro 去到 Javel 站轉火車 RER 去到凡爾塞宮車站 Versailles-Rive-Gauche 落車。之後行左大約十五至二十分鐘左右就到左凡爾塞宮。照慣例，我地先行左宮殿之後再出後花園。個後花園簡值大到冇人有，大到有個人工運河比人 “餐” 艇仔！行到開始傻傻地之後，我地就係花園入面食左個晏仔，再行多陣就返市中心購物去。

第七日…

一早起身，早餐都未食我地就出左去。我地撘 Metro 去到夏瑤宮落車，行左毛耐就去到艾非爾鐵塔。一去到已經見到大排人龍等 lift 上塔頂！好彩早去，排左一陣就有 lift 上。我地先經過一樓上到二樓，之後再撘 lift 上到塔頂！係塔頂望出去真係有種大地在我腳下既感覺，除左… 我身 o個個係咁捉實我，慌死會跌落去咁… 行完就返酒店 check-out 同去機場。話咁快就結束左巴黎之旅… 好期待下一次又去旅行…

因為今次逗留日子大短，好多地方都冇去，就好似聖心堂… 我都係上到鐵塔頂先老遠咁望下聖心喳…

其他所有相在… 這裡。大家慢慢欣賞啦。

後記：走去 tax refund，竟然柜枱話冇歐羅，比美金得唔得喎！？不如比人仔我呀，笨！真係比佢吹到 B 一聲！